Ang Batanggero: Panimula

Batanggero. Ano nga ba ang Batanggero? Hmm... Maraming pwedeng idikit na kahulugan sa salitang ito. Pero lahat ng kahulugan nito... may meaning... (malamang). At bawat kahulugan... merong kang matututunan... (sana lang).

Isa-isahin nating ang mga naisip kong kahulugan para buuin ko ang salitang ito:

Bata: Sa edad kong ito (beinte dos anyos [22]), maituturing pa ba akong bata? Kung ang edad ang pagbabasehan, talagang hindi na ako bata. Pero kung sa mga pinaggagagawa at mga pinagsasasabi ko, malamang, isa nga akong bata.

Batanguenio: Dahil isa akong Batanguenio at ipinagmamalaki ko ito, syempre dapat nakadikit sa ipapangalan ko dito kung saan ako nagmula. Ako ay isang tubong Lipeño sa lalawigan ng Batangas. At sa lugar na ito, marami ang magbabarik (manginginom ng alak) na wala ng ginawa kundi ang lumaklak ng lumaklak.

Tanggero: At dahil madami ang magbabarik sa lugar na kinalakhan ko, natuto akong humawak ng baso sa mga inuman sessions ng mga kaibigan, kabarkada, katropa, katrabaho at kung anong "ka-" na pwedeng isama para magkasiyahan. At syempre, tuwing may inuman, nandyan ang tanggero na laging tumatagay sa bawat pag-ikot ng baso ng mga kainuman. Isa din akong tanggero, na sa bawat pagdating ng baso sa harap ako, dali-dali akong tumatanggi.

At sa bawat inuman at kasiyahan, hindi mawawala ang kwentuhan at kung anu-anong pwedeng pag-usapan under the sun (nice rhyme).

Katulad sa inuman, ang blag (blog) na ito ay magdadala sa inyo ng sakit ng ulo, sakit ng tiyan, sakit sa puso at kung anu-anong sakit pa ('wag naman po). Sari-saring kwentuhan, asaran at kulitan na magdadala sa'yo sa walang hanggang kasiyahan (saan 'un?).

Kaya't umpisahan na po natin ang lasingan. Magsaya sa bawat tagay at sumabay sa bawat kampay. Tumawa ng walang humpay at uminom hanggang mamatay (toinkz! joke lang po)